ڈوبتی آنکھیں

اس دھوپ کی گرمی میں جھلسی ہوئی آنکھوں کو

اک سایۂ راحت کی پر زور تمنّا تھی

جلتی ہوئی آنکھوں میں کتنے ہی زمانے تھے

کتنی ہی بہاریں گم، کتنے ہی خزاں مضمر

کنتے ہی حسیں منظر، کتنے ہی جواں سپنے

سورج کی شعاوں سے جلتے ہوئے کتنے دن

جاگی ہوئی راتوں کی وحشت سے بھری یادیں

منحوس سی آہٹ تھی کچھ آہنی بوٹوں کی

معصوم سی چینخیں تھیں، اشکوں کے سمندر تھے

مجبور و تہی دامن انسان کی بستی تھی

انساں کا ہی خنجر تھا، انساں کا ہی سینہ بھی

پھٹتی ہوئی آنکھوں میں خونین سا نقشہ تھا

مقتول وفائیں تھیں، رقصاں تھیں جفائیں بھی

نا کردہ گناہوں کی کتنی ہی سزائیں تھیں

اک ٹھنڈی ہوا آتی خوشیوں کی بہاروں سے

خوشیوں کے نظارے ان آنکھوں میں بسا لیتی

امید کی ڈوری بھی کچھ خام سی ہوتی ہے

ان ڈوبتی آنکھوں کی حسرت ہی رہی باقی!